無得唔支持，香港好電影，香港人撐！
—
靠我地自己，拍電影可以回本；
靠我地自己，香港電影可以再復甦；
靠我地自己，香港係有變天嘅可能。
—
香港電影未來嘅發展唔一定要係一半廣東話，一半普通語嘅合拍片，香港可以有屬於香港人嘅電影，有時賺少D就賺少D，錢無話賺唔賺盡，搵到夠生活，就可以追夢。
—
合唔合拍片，係咪荷里活大製作，都可以有好嘅電影，但專屬香港人嘅好電影，只有香港人會撐得起，其他人根本就唔知拍緊乜，根本就唔會有共嗚！而你，又選擇撐咩呢？《選老頂》！
監製的話：
大家好，我係杜汶澤。
某一日，自從我踏出左第一步，我已經知道，時代並未允許我過住所謂「以前」嘅美好生活。
我只能夠話，凡事，並唔係我地想像中咁多選擇。
相比起好多人，我嘅所謂犠牲，微不足道到連share都面紅！
無所謂啦！講多無謂，行動最實際。
成立香港電影製作有限公司，目的係做啲嘢，就算係on9，都要做。
「選老坐」呢部戲，亦係呢個時代巨輪下嘅一個副產品，一個縮影，一個現象，而我地台前幕後，雖然無人講過出口，但係，大家都有團暗火，知道呢一部戲，唔只係一部電影咁簡單，而係一個時代！
唔知幾時，曾經有個好X巴X閉嘅大導演同我講，佢話，杜汶澤，你呢啲人，既然咁愛香港，咁就攬住香港同佢一齊陸沉啦！
我想講，我好榮幸，能夠有機會、有資格攬住。
多謝你，你簡直係本土電影之父！
多謝枱底塞錢比我開戲嘅人，我唔會篤灰，資料絕對保密，好心有好報，你地一定賺硬！
更加要多謝所有台前幕後嘅兄弟姊妹，你地比我知道，我並唔孤單！你地至係英雄，我唔係。
聽日，三月三十一號，部戲終於要上嘞，我唔知道，仲有無機會可以再開戲，仲有無機會，拍一啲屬於呢個人地口中陸沉中嘅小島嘅本土電影，就算收得，都唔一定再開到，原因大家一定明白，唔使我介紹番。
我只希望，我有眼見。見證呢個，日出同日落同一時間出現嘅奇景.......
杜汶澤
電影「選老坐」監製、出品人
Search